Sa raste të riinfektimit me Covid ka pasur në Shqipëri? Flet epidemiologia Daja: Negativizohen shumë shpejt…

10 muaj pas ardhjes së pandemisë në Shqipëri, epidemiologët shprehen se nuk mund të flitet për vatra të veçanta, pasi infektimet me Covid – 19 shtrihen në të gjithë vendin. Shpërndarja e koronavirusit është komunitare, ndërsa më e dukshme bëhet në institucionet shtetërore.

“Aktualisht kemi përhapje në komunitet, nuk mund të them se kemi vatër në 1 vend të caktuar. Raste kemi në Tiranë, në Durrës, në Korçë, në të gjithë Shqipërinë dhe pothuajse në të gjitha institucionet ka raste pozitive me Covid. Pra mund të themi se e gjithë Shqipëria është vatër”, shprehet epidemiologia Rovena Daja.

Ri-infektimet me Covid – 19 konsiderohen raste të rralla në të gjithë botën. Holanda dyshohet për 50 raste, Brazili 95, Suedia 150, Meksika 285 dhe Katari 243 raste ri-infektimesh. Dyshime për persona të ri-infektuar me COVID -19  ka edhe në Shqipëri.

“Kemi dyshuar për 3, maksimumi 4 raste ri-infektimi. Por ndoshta këto nuk janë ri-infektime, por riaktivizim. Domethënë personi sëmuret, ndoshta ndonjë vatër ka mbetur në mushkëri dhe në një moment të caktuar ajo riaktivizohet. Ajo paraqitet me simptoma të lehta pak temperaturë, kollë, del tamponi pozitiv, dhe shumë shpejt, pra për 2 -3 ditë del negative”, shton më tej Daja.

Ndërkohë heqja e ritestimit për negativizim ka rritur numrin e testimeve për personat që paraqesin shenja klinike. Ritestimi kryhet vetëm për disa kategori siç janë mjekët apo mësuesit, ndërsa pacientët e tjerë vlerësohen nga mjeku i familjes pas 10 apo 14 ditësh.

Leave a Reply

Your email address will not be published. Required fields are marked *