Forcat Speciale operacion blic në Fushë-Krujë, dyshohet se fshihen vrasësit e Shkëlzen Kastratit, lidhja me ‘shitësin’ e Audit

Forcat Speciale RENEA kanë zhvilluar sot disa operacione blic në zonën e Fushë-Krujës, pasi dyshohet se aty fshihen vrasësit e Shkëlzen Kastratit. 41 vjeçari u ekzekutua në mes të Fierit paraditen e 1 shkurtit.

Kontrolle janë bërë në disa shtëpi të zonës, ku dyshohet se mund të fshihen autorët. Sa herë që ndodhin ngjarje të rënda kriminale në vend, policia zhvillon operacione blic në këtë zonë pasi aty jetojnë persona me rrezikshmëri të lartë.

Poloicia raportohet se ka mundur të identifikojë autorët e dyshuar të ngjarjes,, që janë të paktën 4 dhe po punon për arrestimin e tyre. Ata dyshohet se mund të jenë strehuar në Fushë-Krujë, apo të kenë lidhje me persona të botës së krimit në këtë zonë.

Autoritetet tregohen mjaft të rezervuar në identifilimin e personave që dyshohet se kanë marrë pjesë në atentatin mafioz, por sipas informacioneve një fije ADN-ja e një fije floku e gjetur në automjetin me të cilin u larguan autorët i ka ndihmuar hetuesit në identifikimin e tyre.

Në kërkim janë 3 persona që dyshohet se kanë marrë pjesë direkt në atentat, ndërsa personi i katër është shoferi i një mjeti tip “Audi” që ka pritur në Mbrostar autorët. Pasi kanë djegur mjetin tip Range Rover me të cilin bënë atentatin, autorët janë larguar me “Audi”.

Pikërisht personi që ka pasur në pronësi mjetin tip “Audi” është nga Fushë-Kruja. Ai ka thënë se e kishte shitur makinën por nuk kishte bërë akt-shitje. 

Kujtojmë se, Shkëlzen Kastrati, 41 vjeç, mbeti i vdekur paraditen e 1 shkurtit në Fier pas një atentati të mirorganizuar, në rrethrrotullimin e Sheqit. Ai udhëtonte me mjetin e tij tip Mercedes Benz ML, kur u qëllua me dy plumba që i morën jetën./NewsBomb